E-mail kaw na shiga( Mungdan ga daga, Mali Zup madim a matu lani mi akyu jawm hpyi na saw lajin )

Mungdan ga daga, Mali Zup madim a matu lani mi akyu jawm hpyi na saw lajin

Jinghpaw mungdaw Mali-N’mai Zup hka madim masing hkring mat na matu, ninghkap ai hku nna, mungdan ga daga Jinghpaw ni jawm akyu hpyi shang lawm na matu Jinghpaw Wunpawng Bawngring Mahkri Shawn Hpung (KDNG) kawn saw shaga dat ai lam chyelu ai.

J.W myusha ni a labau shang shara shamat kau hkyen nga ai, Mali Zup na hka madim masing hkring mat na matu, hpawt ni Jinghpaw Mungdaw Nhtoi, January 10 ya shani hta yawng jawm akyu hpyi ai hte shanglawm ninghkap na matu, KDNG kawn laika shabra ai hte saw shaga tawn ai re.

FREE photo hosting by PostMyImage.com
Mali-N'mai Zup makau shachyaw na Hka Madim Kaba lahkawng hta na langai mi (computer hkrang madun sumla).
KDNG a amumadu Slg. Tsaji tsun ai gaw, “Mungdaw Nhtoi hta, myusha ni yawng akyu hpyi na matu saw shaga ai a madung yaw shada ai lam gaw, Mali Zup hka madim a majaw byin pru wa na manghkang ni hpe grau chye na, hkawn hkrang wa na hte, myusha ni a manghkang ni hpe kaga amyu ni grau chye na, mu lu wa na matu re”, nga ai.

“Jinghpaw myusha ni yawng, ndai hka madim hte seng nna, hkrum hkra wa na manghkang ni yawng hpe grau chye na mu lu wa na hte, anhte Jinghpaw ni, ndai zawn jam jau hkrum nga ga ai ngu ai hpe grau mu mada wa na matu yaw shada ai,” nga nna, laika shabra ai hte seng nna, Tsaji matut tsun ai.

KDNG gaw, mungdan kata hta sha nga, maigan nga jing hpaw ni yawng hapng de mung, akyu jawm hpyi na matu saw shaga laika pa ni hpe sa da sai re lam chyelu ai.

Masha wan lam jamjau hkrum na rai nga ai, ndai masing hpe “Mungkang ting kaw na mung, ndai hka madim masing hpe shanglawm ninghkap na matu anhte myit mada ai,” nga nna, shi kahtap tsun wa ai.

Ndai hka madim gaw, tsaw de pe 500 tsaw nna, wan n-gun 6,000 MW shapraw nna, dai hpe Miwa mung de dut sha na re lam chye lu ai. Dai kaw na Myen hpyen asuya gaw, laning mi hta Amerikan dollar wan 500, shang gumhpraw atawng apa lu na re lam, KDNG a saw shaga laika hta mu lu ai.

Lai wa sai shaning 2009, December 21 ya shani hta Myen asuya kawn ndai masing hpe tara shang hpaw dat sai rai nna, Myen hpyen dap kawn, hka mazup grup-yin kaw nga ai mare 60 jan na, masha 15,000 daram hpe, kaga shara de htawt sit na matu matsun da sai re lam mung chye lu ai.

Ndai hka madim lama, daw hten wa ai rai jang, Mali Hka dingyang kaw shanu nga ai, masha n law htum wan 3 jan gaw, hka kata du mat na masa nga ai lam, KDNG tsun ai.

Jinghpaw Wunpawng Hkalup Hpung Ginjaw (KBC) npu kaw nga ai, Myitkyina Ginwang Hkalup Hpung Ginjaw ading tawk woi awn let, du na ra ai, January 17 shani hta hkying hkum 24 tup n sim n sa akyu hpyi na matu hkyen da sai lam, ginjaw sara ni hku chye lu ai.

Ndai hka madim masing hpe, Myen asuya a, Masat (1) Myihprap Wan Dap Hkringmang Rung, Miwa asuya a China Power Investment Cooperation (CPI) hte Asia World Company ni kawn lit la gawgap nga ai re.


Matu Hti ga..

Matut Hti ga...

E-mail kaw na shiga( Manau poi shi laika dap gaw, Myen a alak mi yu sin hkrum nga )

Manau poi shi laika dap gaw, Myen a alak mi yu sin hkrum nga

Mani kaw na Jinghpaw mungdaw mare daju Myitkyina e galaw hpang wa sai “62 ning hpring Jinghpaw Mungdaw Nhtoi Manau Poi” hta “Manau poi shi laika dap” gaw Myen hpyen asuya masha ni a alak mi yu sin hkrum nga ai lam, chye lu ai.

Hpyen asuya ginjaw Naypyitaw na ading tawk shagun dat ai masha masum gaw, mani, Shatapru J.W Htunghking Manau Wang e poi hpaw hpang sai hte, Manau shi laika hpung rung kaw aten tup yu sin, san jep nga ai re lam, Manau shi laika dap shiga lawk hku chye lu ai.

Dai re majaw, Jinghpaw laika hku Manau shi laika shapraw na jin jin galaw tawn tim, Myen Naypyitaw masha masum a yu sin jep san ai lam amyu myu a majaw, shi laika n lu shapraw ai gaw, dai ni poi galaw ai lahkawng ya du wa sai lam, Manau poi shi htawn ni tsun ai.

Ndai sawk sagawn masha masum gaw Naypyitaw hpyen asuya ginjaw rung, shiga dap e amu galaw nga ai, Naypyitaw nga uhpung ningbaw U Tin Win, Naypyitaw nga Datpung hpaji chyoi chye ai U Khin Maung Kyaw hte Yangon nga shi htawn U Ne Linn Way ni re lam, Manau shi laika dap hpe lakap let chye lu ai.

FREE photo hosting by PostMyImage.com
Myen hpyen asuya alak mi shagun dat ai Naypyitaw Manau sawk sagawn masha masum: U Ne Linn Way (pai), U Tin Win (ga-ang) hte U Khin Maung Kyaw (hkra). Ndai masum a aten tup yu sin jep san ai lam ni a majaw, Manau shi laika hpe n shapraw lu ai lam, chye lu ai.

Shanhte gaw, Manau poi shi laika dap hta shani shana makau e azin ayang, dung yu sin hkrum ai majaw, shi amu galaw masha ni wanglu wangla bungli n mai galaw mat ai lam, Manau wang shiga lawk hku chye lu ai.

Bai, shanhte gaw, Manau shiga dap na computer, camera ni hpe jep ai sha n’ga, shi laika ka ngut yang mung, sumla ni hpe "dai de tawn u, htaw ra de tawn u, ndai laika ni hpe hkum bang", nga nna amyu myu pat hkum nga ai lam, matut chye lu ai.

Mani kaw nna, Manau shiga galaw ngut ai hte, Jinghpaw gasi hte sha n mai ka ai nga nna, pat kau ai kawn, dai ni mung, shiga ni hpe guji guyang shagyip shagyeng jep ya nga ai majaw, shiga galaw na yak hkak mat ai re nga, shi htawn ni tsun ai.

Manau shiga dap gaw, tau hkrau nna, Myen laika hte shi laika shapraw na masing n galaw da ai majaw, ya ten, shani shagu na shiga ni hpe Myen hte Jinghpaw hku dip shapraw na n loi la nga ai lam, Manau shi laika dap lithkam ni tsun wa ai.

“Ndai hku pat shingdang ai masa gaw anhte a Jinghpaw laika hte n ka shangun mayu na re. Anhte a sai, anhte a salum, anhte kraw hte ka yang she hti ai mungchying masha ni a matu mung, namchyim rawng na re” nga, shi htawn langai shi a hkam sha ai lam KNG de tsun wa ai.

Bai nna, ya ten, dai Naypyitaw Myen sawk sagawn masha masum gaw, Manau wang na, shamu shamawt ai lam ni hpe mung Ginjaw Naypyitaw de aten shagu, shiga ginlen jaw nga ai lam, Manau wang shiga lawk hku chye lu ai.

Ndai zawn Myen a pat shingdang, yu sin ai lapran hta raitim, Manau Shi Laika Dap gaw, matut nna Manau shi laika hpe myit galu kaba ai hte shapraw lu hkra shakut mat wa na re lam, KNG sagawn chye lu


Matu Hti ga..

Matut Hti ga...

E-mail kaw na shiga( Manau poi hpang sai hte Myen a dingbai dingna jaw hkrum )

Dai ni, “62 lang na Jinghpaw Mungdaw Nhtoi” Manau poi hpe hpaw hpang wa sai hte, Myen hpyen asuya gaw lam amyu myu hku dingbai dingna jaw nga sai lam, Manau poi shiga lawk kawn chye lu ai.

Dai hpawt jau jau, Shatapru Jinghpaw Wunpawng Htunghking Manau Wang makau, Njang Kawng mahkrai pawt na, “Manau Poi kaw nna Hkap Tau La Ga Ai” ngu ai Chyinghka kaba e, hpyen asuya mawdaw PK (mawdaw hte saike jep rim balik) ni gaw, poi sa masha ni hte, gat sa masha yawng hpe, saike rim kyin nga ai lam chye lu ai.

FREE photo hosting by PostMyImage.com


62 ning hpring Jinghpaw Mungdaw Nhtoi, Manau Poi kaba hpe, Shatapru J.W Htunghking Manau Wang e, dai hpawt buga ten 7:30 a.m. hta hpaw poi galaw hpang wa sai.
Poi shawa ni law law rim hkrum wa sai hte, saike gup chyawp n lawm ai ni, gupchyawp chyawp nna, laisin n lu ai ni yawng hpe mung rim zing kau ya na re lam, PK balik ni tsun ai.

Sha n-ga, Myen ahkaw hkang lu ni gaw, shaning shagu Manau poi ten dip shapraw ai, “Manau shi laika” hpe mung n shapraw na pat hkum nga ai lam, Manau shiga dap kawn chye lu ai.

Dai ni, Manau poi shiga dap kawn, shapraw hkyen ai Jinghpaw Shi Laika hpe yawng ngut ai hpang, n shabra na matu, pat hkum ya kau hkrum nna, lama shabra yang, Myen ga hte shapraw na matsun wa sai lam, poi shabyin shatai komiti shiga lawk hku chye lu ai.

Matut nna mung Myen gaw, shiga ni hpe mung, kata lam jep san nna, n mai ka ai shiga ni hpe mung matsun wa ai hte labau hte seng ai hpe sha shapraw na matu matsun ai lam ni hte, Manau Shi Dap ni shagyip shagyeng hkrum nga ai lam, Manau Shi Dap shiga lawk hku chye lu ai.

Ya na zawn, J.W sha ni yawng Manu shadan let, kabu aw law ai Manau poi ladaw e ndai zawn Myen hpyen asuya pat hkum dingbai dingna wa ai majaw, Manau poi sa mungchying masha ni lapran, myit dik myit pyaw lam atsawm n lu la ai lam, KNG sagawn chye lu ai.


Matu Hti ga..

Matut Hti ga...

Mali Zup na dum nta 500 shawng, htawt sit ra sana

Jinghpaw Mungdaw, Mali Zup e myihprap wanjak masing a matu hka madim kaba shachyaw na re majaw, madim a hka lim gaiwang kata buga masha dum nta 500 hpe shawng n'nan htawt sit kau sana re lam, Myen hpyen asuya tara shang tsun shapraw dat sai re.

Ndai dum nta htawt sit na lam hpe, ndai bat pru Langai Ya, Dec. 21 ya shani, Mali Zup e galaw ai, “Tara shang hka madim gawgap na hpaw poi lamang” e du sa ai Myen asuya ahkaw ahkang lu ni, tsun shaga wa ai re lam, lamang sa du lawm ni tsun ai.

Htawt sit na dum nta madu ni hpe n-gu buri mi hte sha sau joi mi hpra mung, kumhpa jaw na matu, ya ten, hpyen asuya gaw n-gu buri 500 hte sha sau joi 500 hpe jin jin galaw da sai lam, matut chye lu ai.

FREE photo hosting by PostMyImage.com

Myitkyina a dingdung de deng 18, Chyinghkrang mare makau bulldozer hte ga htu shara nga yang. Ndai shara kaw htawt sit dum nta ni hpe shara jahkrat ya na matu re.
Htawt sit ra na dum nta 500 hpe Mali Zup madim shachyaw na mying hkam ya ai Asia World Company hku nna lit la gawgap ya na rai nna, ya ten, company gaw, hka mazup makau, mungdaw mare daju Myitkyina a dingdung de deng 20 ram tsan ai Chyinghkrang hte Lungga Zup lapran, mare ningnan de na lamu ga htu shara nga sai lam, myi-chyaw-mu buga masha ni tsun ai.

Ya ten du hkra gaw, htawt sit ra na dum nta madu ni kadai re ai hte galoi htawt sit ra na lam hpe seng ang ai asuya salang ni tara shang shiga sa shana ai lam gaw n nga ai lam, Mali Zup mare Tang Hpre buga masha ni tsun ai.

2007, December shata shapraw ai, Htai mung-daju J.W Bawngring Mahkri Shawn Hpung (KDNG) a sumtang laika hte maren nga yang, Mali Zup madim a majaw grup-yin kahtawng 60 jan na masha 15,000 ram gaw, atik anang htawt sit kau hkrum na re lam, tang madun tawn ai.

Shawng e Mali Zup myihprap wanjak kawn wan n-gun 3,600 MW shapraw na tsun da ai raitim ya gaw myihprap wan n-gun 6,000 MW du hkra jat shapraw na re lam hpe seng ang ai madi gawgap company yan hku nna bat langai ya shani na lamang e tsun wa sai lam, lamang sa du lawm ai ni matut tsun wa ai.

Myen-Miwa myithkrum ga sadi npu, Mali Zup, snr Mali Hka hte N’Mai Hka mazup lawu e galaw na hka wanjak masing hpe Asia World Company hte Miwa asuya a China Power Investment Corporation (CPI) yan lit la galaw nga ai re.

Ndai company yan gaw, amu galaw masha marai 80,000 jai lang na re hta, marai 40,000 gaw lawu mung na Myen ni rai nna, ngam ai ga-ang hkup gaw Miwa mung na amu galaw masha (kung-ring) ni rai na re lam, bat langai ya shani na lamang hta company salang ni tsun mat wa sai lam hpe KNG sagawn chye lu ai.

Ya ten, Miwa kung-ring 2000 ram hte Asia World Company a amu galaw masha tsa lam gaw, Mali-N’Mai Zup e ginsum gap rawng let hka madim hte seng ai amu bungli ni galaw hpang nga sai lam, buga masha ni kawn chye lu ai.



Matu Hti ga..

Matut Hti ga...

Hard Disk nnan

Free Image Hosting at www.ImageShack.us


Ya nnan pru ai Hard Disk gaw SSD ( Solid State Drive )rai nga ai. Dai hpe Notebook nkau mi kaw mu lu nga ai. Ndai SSD ngu ai gaw Camera ni kaw law malawng mu lu ai SSD memory card kasha ni rai nga ai.Ya ndai ssd hard disk mung dai memory chips ni a system hpe madi shadaw na galaw shapraw ai re. Dai majaw shi kaw motor ni,platter ni nlawm nga ai. SSD disk na galaw ya lu ai atsawm gaw lawan ai, myi hprap jak nau nlang ai, grau na shim ai hku lu lang ai. Law malawng notebook ni kaw lang nga ai. Lawan ai ngu gaw... Notebook ni kaw 15 seconds hte desktop hpe mu lu ai. 2 seconds hte shutdown lu galaw ai. Wan nau nlang ai majaw notebook na power kaw battery hpe aten na na lu lang ai hku re. 1 hour lang ai notebook gaw 1:30 hour daram lu lang nga ai. Save byin ai ngu ai gaw.. motor hte platter ni hta grau na save byin nga ai. shi gaw chips ni kaw zing ai system re majaw. Lang ai shara hpe ya mu lu ai gaw notebook nkau mi kaw lang taw nga sai. Mac book air hte laga notebook ni kaw lang taw sai hpe mu lu nga ai. Manu gaw 160GB hta Thai gumhpraw 15000 daram rai nga ai.Hpa de gaw yawng chye ai hte maren law wa yang gaw manu mung yawm wa na sha rai nga ai.

law malawng chye da ai hard disk ni gaw Motor hte Platter nga ai kaw na Hybrid Drive rai nga ai. shi gaw window vista system ni kaw lang na matu yaw shada da nga ai. Hybrid galaw ya lu ai gaw... lawan ai bai na zing da ai shara law ai. shi ga ya hpang de pru na da.

Matu Hti ga..

Matut Hti ga...

Mungkan hta asak kaba dik ai blogger si mat sai.

Free Image Hosting at www.ImageShack.us



Mungkan hta asak kaba dik ai internet blogger langai re ngu na tinang hkrai masat la ai Spain mungdan kaw na Maria Amilalopice gaw asak 97 kaw si mat sai hku re.

Laiwa sai lahkawng ni kaw na hpang na Clasia myo kaw na panglai makau hte ni ai nta kasha kaw blog hpe shawng lang ai hku re.

Maria a sak( 95 ) hpring Birthday kaw shi na kashu gaw Birthday present hku nna http://www.amis95.blogspot.com hpe galaw ya,

dai kaw na Maria gaw blog hpe ka hpang ai hku re.

Maria gaw shi na blog hta Mung masa lam, Spain mung masa lam ni gin lam amyu myu hku nna ka mat wa ai shaloi, kade nna yang mungkan masha ni yawng chye wa ai.

Maria gaw ndai prat hta byin taw ai mung masa ni hpe ka ai majaw. Media hte seng ai ning hkring ni hku na shi hpe kumhpa shagrau ai. Bai na Spain mungdan kaw na Ningbaw kaba wa mung shi hte hkrum shaga sai hku re.

February shata kaw shi hpang jahtum ka da ai gaw " Internet hpe lang ai shaloi nye a hkam kaja lam hpe malap kau ai. masha ni hte tsun shaga jahta ai gaw grai kaja nga ai. ndai hku matut mahkai taw ai gaw bawnu hpe garang ai re, tinang ndu ga ai mungdan, tinang nchye ai hpaji ni hpe mai jahta san la mai nga ai " ngu na hpa jahtum ka da ai hku rai nga ai.
Matu Hti ga..

Matut Hti ga...

Internet kai chyen galaw ai ngu na miwa mungdan hpe shadu

Free Image Hosting at www.ImageShack.us


Mungdan 100 jan kaw na asuya ni na computer ni hpe internet hpe internet network kaw na shang nna kai chyen hkawm ai hpe miwa mungdan re ngu na tsun ai hpe.....Tibat asuya gaw grai tsang taw ai lam hpe tang madun dat ai. Tibat hpung kyi kaba ( Dalai Lama ) a rung kaw lang ai computer ni kaw na shiga ni,data ni hpe miwa asuya gaw lu la ai zawn nga ai hpe Tibat asuya gaw tsun taw ai.
India du Tibat masha ni kaw na computer ni kaw jam jau hkrum a majaw grai dam lada la ai internet kaichyen ni hpe jep shagawn la lu ai hpe Internet shim lam ni kawn chye lu ai. ndai Internet kaichyen a ningpawt gaw Miwa mung re ngu tsun ma ai.

Ghost Net ngu ai Internet kaichyen gaw mungkan kaw nga ai asuya,kasa rung,NeTu hpung, shiga,media laga u hpung u hpawng ni na computer 1,000 jan kaw shang na shiga,data ni hpe shaw la kau ai ngu na British,American,

canada ni kawn jep shagawn lu ai re hpe chye lu nga ai.
Ya na zawn internet kaw na kaichyen galaw na shiga ni hpe la ai hpe number 1 lang hku na mu ai gaw Tibat hpungkyi Dalai Lama nga ai shara India sinna maga de na Daramsala myo ngu ai kaw rai nga ai. Ndai lam hte seng na Tibat asuya ( Thubten Samphel ) gaw ndai hku tsun nga ai.
"anhte a computer ni kaw Virus gawa katut ai hkrum sha taw ai. anhte na computer kata kaw nga ai shim ra dik ai shiga ni, laga data ni kaw mung ndai virus gaw shang shalau taw ai re hpe hkrum sha taw ai.
Ndai kai chyen bungli hpe miwa asuya kaw na galaw taw ai ngu ai hpe mi tut mu nchye lu shi nga ai. Raitim mung Dalai Lama a computer kaw na shiga ni hte data ni hpe lu hkra lu la ai ngu ai gaw grai byin ai grai ning tawng ai re ngu na tsun lu nga ai .

Ndai Internet kaichyen gaw comptuer kaw rawng ai data,shiga, Email ni hpe sha lu galaw ai sha nrai. Gawk langai kaw sha internet lang na Vedio Camera, microphone ni hpe lang na ga shaga ai ni hpe mung lu la nga ai hpe Canada hpaji ning hkring ni kawn sawk shagawn lu ai hku rai nga ai.
Cambridge jawng kaw nga shapraw ai shiga hta gaw ya na zawn Canada kaw na ndai hku miwa ni re ngu ai hpe sawk shagawn lu ai hpe hkap la nga ai.

Ya na zawn miwa mungdan hpe shadu ai gaw miwa mungdan hpe jahkrit na, sinna mungdan de na ni mung masa hku nna galaw sa ai re hpe miwa shiga media lawk kawn bai nhtang tsun dat ai.
Matu Hti ga..

Matut Hti ga...

Super RAM

Free Image Hosting at www.ImageShack.us


Tinang na computer na Memory hpe lawan hkra galaw ya lu ai SuperRam hpe mara dat ya ai. Tinang computer hpe lang taw ai shaloi Memory hpe kade daram lang taw ai hpe mung madun ya nga ai. Memory na system hpe mung jep yu yang mai nga ai.
Chyawm mayu ai ni Ndai kaw yaw...


Matu Hti ga..

Matut Hti ga...